對底妝有要求、而又捨得花錢嘅 ladies，對 SUQQU 呢個日本專櫃牌子一定唔陌生~
被喻為日本 No.1 底妝品嘅 SUQQU，响當地名氣同售價都拍得住 clé de peau，而且仲穩佔各大日本雜誌 No.1 獎項，因而好多人都會將兩者比較。
而我就認為每一個品牌都有佢好用 / 唔好用嘅產品，尤其以高檔貴牌計，係未必每樣產品都可值回票價，今篇就分享吓 SUQQU 嘅底妝品有咩好用 + 唔好用啦 🤗
雖則我舖頭都有佢嘅賣底妝品，不過好用 / 唔好用都會照直講喇~
今次去日本响 SUQQU 玩咗好耐，所有新出產品 / 顏色都試勻了 →
SUQQU 最出名嘅係 makeup base / 粉底 / 碎粉 →
如對比起歐美 / 韓牌底妝品，我自己都認為日本牌子係更適合 HK 人用的，總括而言冇歐美嗰啲咁偏粉紅，粉質更適合 Asian 膚質，亦冇韓牌底妝品咁白咁光身、咁少色揀。
至於佢嘅眼影組合 / 漸層色胭脂 / 唇膏唇采等等，都好吸引! 只係售價偏貴 (如眼影都要 $500 蚊盒)，如非情有獨鐘建議買平少少嘅品牌都一樣效果。
2018 春夏底妝新品
先講一講 2018 春夏新出呢款「Blooming Glow Primer」妝前底霜 →
係一支有透光感 + 潤澤效果 + 調色功能嘅 makeup base，比平常 tube 裝嗰支皇牌「Treatment Primer」更清爽，效果係好水潤柔滑、好貼皮膚、調色效果自然、同時亦有撫平細紋效用，適合乾性肌春夏使用~ 👍🏻
不過因為搽完都有種光透感，偏油膚質 / 愛啞緻妝感的人就唔啱用了。
呢支係 3 月先開售，我去日本時仲未有得買，只能試到 tester。而日本係賣 $480 左右，如 HK 水貨應該要約 $600 幾。
(部份圖片 copy from SUQQU 官網)
同為 2018 春夏新出的「Nude Wear Liquid Foundation SPF19 PA++」光感裸妝粉底液 →
係一支滴管形式、好稀身嘅粉底液，水潤精華液質地，分開水 / 油兩層 (用前需搖均)，質感就好似 "精華液 mix 咗精華油、再 mix 埋粉底液" 咁，主打無瑕裸妝感。
遮瑕度係 ok 的 (屬中等)，均勻膚色冇難度，質感係好貼面、好光滑、好透薄、好保濕潤澤、仲有柔膚同撫平細紋效果~
但由於精華比例較高，coverage 相對唔太高，掩蓋唔多太多瑕疵，而且效果係充滿亮澤感，都幾潤身吓，所以只適合 dry skin / 皮膚瑕疵唔多的人使用了。如以 HK 夏天咁潮濕悶熱計應該用唔到 (冬天還可以)，持久度會減弱一大截，好快會出油。
呢支同樣係 3 月先開售，我去日本時仲未有得買，只能試到 tester。而日本係賣 $560 左右，如 HK 水貨應要約 $700 幾。
Foundation 粉底
舊款「Frame Fix Liquid Foundation Lightless SPF30 PA++」啞緻粉底液 →
叫佢做舊款，係因為 SUQQU 專櫃今年已經冇放佢出嚟了，官網內亦唔見咗佢，可能係將會停產 / 唔暢銷? 🤔
呢支粉底液遮瑕度其實係唔錯的，不過見佢取名為 "lightless"，就知佢係啞緻型妝效，確實質感都真係幾乾吓，只適合油性肌夏天使用。以近年大 hit 光感柔潤底妝計，matte tone 控油粉底的確已冇存在空間 (用咗易起乾紋同卡粉呀).....
但有興趣的話仍然仲可於日本專櫃試到買到，只係收埋冇放出嚟咁解，問就有的了~
再嚟係皇牌 No.1「Extra Rich Cream Foundation SPF30 PA++」精華粉底霜 →
係 SUQQU 粉底史上蘊含最多美容精華嘅粉底霜，亦係被喻為日本 No.1、可媲美 clé de peau 嘅粉底霜。添加 12 種日本植物性保濕精華成份，配以特製嘅潤澤光感液，能即時改善膚色暗沉 / 膚色不均 / 皮膚乾燥唔貼粉等問題，妝效潤澤飽滿而富光采。
以 SUQQU 粉底計，呢款 foundation 係最適合 HK 氣候用，質感亦最適合一年四季用的，遮瑕度方面亦為幾款 foundation 之中最高 (比 clé de peau 還要高)，較貼合 HK ladies 愛有遮瑕度嘅要求，而且持久度係非常好~
除咗效果貼面柔滑、撫平飾修到乾紋同毛孔、感覺夠保濕得來唔會太潤太光之外，個人亦認為呢款 foundation 會比較 flexible，要淡妝可自行將粉底減量 / 想要高少少遮瑕度又可自己逐層添加 (係 buildable 的)。
我認為佢係好用過 clé de peau 的，適合混合肌 / 乾性肌使用 👍🏻
呢款我舖頭都有出售，HK $980。
粉底我一向用開佢，去日本時亦有帶佢，裝咗少少落樽仔度帶去旅行用 →
厚搽效果可以好無瑕! 而且唔覺會好厚妝，有奶油肌 feel 😍
薄搽的話妝效亦可以好自然，適合日常用 →
所以話呢款 foundation 係更 flexible，厚薄可隨意 😊
以前亦已拍過 "測試一天片" 示範同介紹過呢款 foundation + 皇牌 Treatment Primer 底霜 →
幾個月前新出嘅「Frame Fix Moisturizing Solid Foundation SPF25 PA++」水凝粉底膏 →
賣點係有仿如用熱毛巾敷面後咁水潤光澤，質感滋潤貼面，遮瑕度高得來唔厚妝。
我用過就認為呢款粉底係出晒事、超雷呀! 仲要成 $680 蚊盒 😫
唔單止唔貼面、乾到爆、仲要勁浮粉、又勁難搽得均勻，就算皮膚幾靚用咗佢都會降 grade!
首先試用附設嘅 sponge 上粉 →
試咗幾日，無論乾用 / 整濕個 sponge 用都好，粉底都係推唔勻、難上粉、唔貼面! 總之係搽到面都爛，啲粉底都未貼到上面嗰種，仲要炒起晒我搽咗嘅 skincare，形成一堆擦膠碎! 😤
同樣嘅 skincare 我用 SUQQU Extra Rich Cream 粉底霜 / 其他牌子粉底膏，都冇試過呢種情況的! 見到塊面嗰堆擦膠碎，我已經好想掉咗佢!
效果差到連相都唔想影，未見過自己塊面咁衰......
之後我再俾多次機會佢，用另外買嘅 SUQQU 濕粉掃再試 →
效果仲衰過用粉樸，完全係踩晒地雷呀! 勸大家唔使考慮呢盒粉底膏了......
解決方案 : 係可以溝啲精華油落去用嘅，但每次咁樣做都頗麻煩，咁貴 $680 買盒粉底膏就係希望唔想煩、可以一次過上粉 + 遮瑕之嘛...... 😢
Powder Foundation 粉餅
皇牌「Lucent Powder Foundation SPF20 PA++」晶瑩光感粉餅 →
可取代粉底液用 / 補妝用，適合追求高質量輕柔而貼面粉質嘅 ladies，打破平常粉餅嗰種厚粉 / 乾燥 / 唔貼面嘅印像，仲 cover 到毛孔，係我用過之中最好嘅粉餅! ❤️
由於係有遮瑕度，用嚟補妝仲可以遮返甩咗 / 溶咗嘅瑕疵~
呢款我舖頭都有出售， $740 (粉底 $580 / 粉盒連粉樸 $160)。
粉盒設計係 SUQQU 貫設的黑盒 feel →
大家知我一向好怕用粉餅上妝，多數只會用嚟補妝，覺得用粉餅取代粉底液上妝會厚粉啲 + 乾啲。不過我當然知道朝早返工係好趕時間，好多人會務求快靚正用粉餅上妝啦~
下圖係搽完 skincare → 遮瑕膏 → 再全面印上呢盒 SUQQU 粉餅 →
效果比我預期之中好好多! 以粉餅上妝計唔算乾之餘仲好貼面，修飾到粗大毛孔，有遮瑕度得來亦唔厚粉，連我超乾嘅鼻翼用都好貼，持久度亦好 long keep 👍🏻
Meanwhile 仲有種淡淡自然光感，又唔會令到我浮粉 / 出油 →
除咗作為粉底用之外，如用嚟補妝直頭係掂! 💕
本身出咗油、溶咗妝嘅位一印上去即刻完美返，連色素都 cover 到又貼皮膚~
另外我亦試過用 SUQQU Extra Rich Cream 粉底霜後，再印呢盒粉餅定妝 →
不過咁樣配搭就太高遮瑕度了，個妝會有啲厚.....
始終 SUQQU 隻粉底霜 coverage 已經夠高，而呢盒粉餅 coverage 又唔差，兩者共用係 too much，建議都係各自單用更好。
係一款含有散光微粒粉末，運用光線原理修飾粗大毛孔，有遮毛孔 + 控油效果嘅透明冇色粉餅。除咗可以用嚟補妝之外，仲可以用嚟取代碎粉定妝。
日本係賣 $480 左右，如 HK 水貨應該要約 $600 幾。
呢盒我都用咗好耐，雖然粉質係好幼滑，但係遮瑕度係零，純粹只能定妝 / 減油光。
雖然係可以修飾到毛孔，但因為粉質真係有啲乾，對我呢啲中女乾肌而言，毛孔正正就係因為皮膚乾先變得粗大，所以用佢就反而乾上加乾，唔係好 cover 到毛孔了。
不過勝在盒粉 size 夠細，放手袋帶出街補妝唔阻位置 👍🏻
Loose Powder 定妝碎粉
SUQQU 嘅碎粉我用咗好耐喇! 由舊版用到新版，雖然價錢唔係平，但仍然覺得佢好無敵 😍
新版碎粉 total 有 4 款，包括 :
Oil Rich Glow
Sheer Loose Powder
Natural Covering
Soft Velvet
4 款粉質都係打磨得極幼滑、好透薄自然、唔乾唔厚粉、好貼皮膚的，但妝感 / 持久度上就會有少少唔同 :
Oil Rich Glow
呢款我唔建議，雖然添加咗精華油係好潤澤，一啲都唔乾，但係真係有啲潤，持久度唔高，會只適合極乾肌膚 x 愛極度光澤感嘅人秋冬用
Sheer Loose Powder
同舊款幾乎係一樣，主推透薄定妝效果，同時具少少珠光透亮感，半補濕半控油效果，適合乾性肌 x 愛有透光感底妝的人用
Natural Covering
係大多用家推薦嘅一款，唔乾之餘係啞緻冇珠光，具輕微遮瑕度，可修飾粗大毛孔，持妝效果亦比較好，適合混合至乾性皮膚用
Soft Velvet
具絲絨柔焦效果，能 blur 毛孔細紋，有珠光透亮感，顏色偏粉紅，適合膚色偏白的人用
Natural Covering 我舖頭都有出售，HK $600。
試過 4 款之後，都係 Natural Covering 新版呢款比較好，會更適合 HK 潮濕氣候使用，冇其餘 3 款咁光身，持久度同定妝效果都較好，適合任何膚色 👍🏻
附設嘅粉樸質料亦屬高質量，用嚟上妝亦唔會好乾 / 好厚粉 →
另外新版亦改用咗彈性網設計 →
用時唔使倒粉出嚟，將粉樸 / 化妝掃直接掂落去個網就沾到粉，比較方便同慳時間。
基本上我近幾個月化嘅妝都係用呢盒 loose powder 定妝 →
效果自然，冇厚粉感覺，唔會乾爭爭，能融合皮膚，有微微遮瑕度
Concealer Set 遮瑕
能遮蓋面上瑕疵及黑眼圈，一盒 3 色，顏色可根據膚色自由挑選。
雖然望上去同 IPSA / Impress 遮瑕膏組合相同，但好處係有顏色揀，唔似得 IPSA / Impress 係 已經 fix 死咗無得揀顏色 👍🏻
不過其實可以揀嘅顏色並唔算多，只係得 :
2 色遮瑕膏 (一深一淺膚色選擇，質地乾少少，遮瑕度高啲啲)
3 色 corrector (黑眼圈打底調色用，質地薄啲保濕啲，但遮瑕度低啲)
而第一行嗰 3 隻色係光影膏，其實唔關遮瑕事
用法係先搽 corrector，再搽多層遮瑕膏
比較起 IPSA 同 Impress，呢盒 SUQQU 顏色已經叫多選擇，至少有黑眼圈調色用嘅 orange tone corrector 先，質地亦唔乾，唔起眼紋，仲好貼皮膚好自然添~
不過遮瑕度並唔算太高，只適合黑眼圈唔深嘅人用，而暗瘡印我試過就唔係好遮到 (約只遮到 5-6 成)，比起差不多價錢嘅 clé de peau 遮瑕膏 coverage 相差好遠，其實計返容量都少過 clé de peau 好多，唔建議買。
Primer 妝前打底霜
呢支皇牌「Treatment Primer」妝前底霜，以前都有介紹過 →
添加紅花籽油、杏桃核仁油、月見草油、山茶花油 4 種潤澤精華油，質感潤澤，可即時撫平乾紋，仲有牡丹粉提亮膚色效果，上面個粉底 video 亦有示範用過佢，一搽已經有美肌 feel~ 呢支 dry skin 係值得試的 😍
呢支 base 又係攞過好多日本雜誌 No.1 獎項!
雖然我係好鐘意呢支 base，認為佢效果好好，不過易出油嘅膚質就唔多啱用，單純係 dry skin 恩物。
今次去日本我都順道幫舖頭補咗少少貨 →
Makeup Secret 官網:
Facebook 專頁郵購:
Isa你好, 請問你用SUQQU嘅Lucent powder foundation係用幾多號色?
回覆刪除102～
刪除