我再婚了~

26/5 呢一日，我又再次成為 Mrs~

成為單親媽媽一年後，估唔到好快就遇到一拍即合的另一半，拍拖幾個月就計劃結婚，雙方朋友家人一方面替我哋開心，另一方面又會怕我哋行得太快會擔心。

其實呢~

尋覓半生又跌過痛過，都只不過係想揾到一個愛錫同珍惜自己嘅人，既然咁啱遇到，大家性格又咁合拍，理念目標又一致，又能理解雙方所需，相處到舒服成咁就決定結婚了 🎊

拖我拍過，婚我離過，我只能夠講由我結識我老公至而家，雖然只係好短時間，但我一直認為遇到佢係我嘅福氣，能夠遇到一個咁愛錫同照顧自己嘅人，仲要咁錫我一對小朋友，我已經好幸運~

而我老公亦奇怪點解我兩度前任會唔識得珍惜我，所以感情事從來都係人夾人，夾得到自然會認為對方好吧? 只要做好自己本份，時機成熟了緣份自會出現~

然後有 follow 我 Facebook 的讀者，應該已知道我又懷了第 3 胎~

公佈喜訊之前，我已經預咗外人會點諗，始終 3 個小朋友唔同爸爸，閒言冷語一定有，我好理解呀，亦一啲都唔介意，介意就唔會做呢個決定~

反而係一班好同事 / 好朋友會介意人哋話我，覺得外人係因為唔知當中原因先會有閒言，要我安慰返轉頭 haha~

我都係嗰句啦~ 結得婚冇人想分開，分開得就一定有苦衷，所以既然可以做嘅已經做齊，咁跌低咗都總要起返身，樂觀面對將來~

而過去 10 年間呢 2 段感情我亦冇後悔過，始終都係我人生經歴一部份，只係條路比較上冇咁平坦，但都過去咗了，以後一家人安安穩穩就足夠~ 💕