唔請陪月姨姨，自己坐月要點做?

話說早 10 年 8 年前，陪月姨姨只係部份有 budget 嘅人家先會請，進展到近年幾乎 7-8 成孕媽都會請。所以自從我 🤰🏻之後，就有好多讀者 inbox 問我 book 咗邊間陪月呢?

我....... 其實...... 真係完全冇諗過要請呀! 🤣

好多人聽到都話「下? 唔請?!」似乎好驚嚇.... 😅

其實好多人以前生嗰陣都冇請陪月㗎，冇話唔得嘅，係辛苦少少囉，但自覺辛苦一下都係一個過程，值得的~ 更何況既然我頭 2 胎都冇請陪月，頭一胎仲要係 31 週早產嬰都攪得掂，呢一胎就更加有經驗唔需要請陪月了~

但對於生第 1 胎嘅媽媽嚟講一定係會緊張啲，擔心唔知點應付好，如冇家人幫手，請個陪月照顧一下亦無可厚非~ 無論大家有冇打算請陪月，我都 share 少少自己嘅坐月經驗同心得，等大家有個知字啦 🤗

食 / 湯水方面

坐月期間不宜大量進補，要食得清淡，來來去去都係清菜 / 蒸雞 / 薑飯 / 蒸肉餅之類，煮法唔係特別難，加上而家網上啲坐月餐單咁公開，仲教埋煮法、有咩湯水合適等等，工人姐姐 or 屋企人都煮到，冇人煮仲可以上網訂「坐月餐 / 上奶湯」每日送上門𠻹!

網上「坐月餐」訂購公司眾多，每日速遞一日三餐月費由 $8000 至萬幾蚊都有，附上其中一間資料 : https://www.ulifehk.com/

但格過價最平月費都要 $8000 左右，仲要只得一人份量，想慳 $ 就當然係揾家人 / 工人姐姐幫手煮啦，不過湯水就未必人人識㷛、準備功夫亦繁多，我就覺得可以上網訂 😉

如果想額外進補亦可考慮「滴雞精」，打開翻熱就飲得，好方便! 我係買呢隻:
http://isadoracheng.blogspot.com/2018/07/50.html

另外坐月期間係唔適宜飲清水，要飲「炒米茶」取代，而「炒米茶」整法係極 easy! youtube 都有教 : https://www.youtube.com/watch?v=DRuGHm0Dhk4

唔想自己整，亦可上網買「坐月炒米茶茶包」，加熱水一焗就飲得:
https://www.facebook.com/msloricetea/

記住唔好飲凍嘢呀~~ 😉

照顧自己方面

唔好經常企 
坐月期間子宮未完全歸位，千萬唔好企咁多! 唔係嚇你，日後會有尿滲 / 尿頻 / 失禁問題㗎!

順產的話下陰會有傷口，買個中間通窿嘅咕𠱸墊住坐就唔會咁痛了 :
https://item.taobao.com/坐墊

想子宮快快回位 + 收返鬆弛嘅肚皮，當然係請定個「古法紮肚師」上門，連紥佢 10-20 日最 perfect 啦! (我都已預早 book 咗)

冇 budget 都要平平哋去淘寶買條「產後束腹帶」，日日紮佢至少 8-10 個鐘呀! 我都買咗:
https://detail.tmall.com/產後束腹帶 

沖涼 
好明顯係唔沖得! 視乎自己捱到幾耐了 🤣

我就試過最長只能捱到 2 星期，期間每日都會用熱薑水 + 毛巾抹身。薑要在生 BB 前預早買一大袋，自己刨定皮曬乾，坐月時將薑皮加熱水浸在盆中就可用來抹身 / 淋身了。

剪髮?
唔少孕媽都會將頭髮剪短，諗住坐月期間會更方便打理。但提提大家短極都盡量以紥得起馬尾為前提，短到連馬尾都紥唔到其實係仲麻煩! 😩

唔洗得頭則可用 dry shampoo 噴霧頂一頂，如 Watson's / sasa / 萬寧都有售的 AUSSIE / Batiste dry shampoo。 萬一忍唔住要沖涼就緊記要快手，沖完仲要即刻吹乾晒把頭髮~

洗手一定唔可以用凍水
湊 B 當然要勤力洗手! 而關於洗手咁簡單嘅事......

唔到你唔信，我生完第 1 胎坐月時就係貪快貪方便，一打開水龍頭就用凍水洗手，攪到之後嗰幾年都經常手痺 / 手震! 結果要等到生完第 2 胎坐返好個月，症狀先消失呀! 所以緊記要開住熱水爐洗手~

至於產婦衛生巾要經常更換呢點，就唔使多講啦~

另外每次去完洗水間後，都要用產婦清洗瓶沖一沖妹妹確保衛生 😉

湊 B 方面

新手媽媽通常都會好擔心唔識湊，其實 new born 只係識食 + 瞓 + 喊 + 大小便 😅

俾多少少耐性細心照顧就可以了，醫院通常亦會教點 take care 初生 BB，例如點餵佢 + 點沖涼 + 點換片 + 點清潔臍帶等等~

而健康嘅 BB 瞓瞓下喊，一般只得 3 個原因 : 肚餓 / 尿片濕咗 / 純粹扭抱

媽媽只需要 →

Step 1. 先 check 尿片係咪濕咗要換 
先墊尿布墊 → 墊新尿片響底 → 抹 pat pat → 搽尿片膏 → 換新尿片

Step 2. 餵奶 
New born BB 胃細、飲奶又未係好叻，未必次次飲得足，飲唔夠自然會好快肚餓會喊，係好正常。如果佢肯飲的話、飲完再成功掃埋風就 ok，可以放返落床瞓~ 但就算掃完風打咗嗝，都最好打側少少佢個頭瞓，預防嘔奶窒息

Step 3. 記住幾點飲過奶 + 飲咗幾多
如果過咗下次飲奶鐘數而 BB 又未瞓醒，其實都可以俾佢瞓多一陣 (除非佢好瘦弱)，肚餓自然會喊醒叫你餵佢了

若然飲咗奶 + 換咗尿片都仍然繼續喊的話，就要 check 一 check 佢有冇發燒 / 係咪著得太多衫 (BB 怕熱㗎) / 肚仔係咪唔舒服 (呢點睇便便可知一二)。若然全部都冇事，咁可能只係純粹扭抱，抱多佢一陣安撫一下通常都會自動瞓返的 👶🏻

萬一覺得 BB 有發燒 / 任何唔舒服，就要立刻抱去睇醫生唔好等，醫生會識得處理，亦會教你返到屋企要點做了。

預祝各位孕媽生個健健康康、肥肥白白寶寶、坐月坐得好~ 🤗