2019年7月31日 星期三

Bobbi Brown「晶鑽保濕修護精華素 Extra Repair Serum」用後感

呢支皇牌「Extra Repair Serum」經已推出咗好幾年, 一直都有其捧場客, 用家普遍都讚好~ 

不過我對 Bobbi Brown 嘅䕶膚品就冇乜特別偏好, 以前用過佢啲 skincare 覺得唔太特別, 又覺得呢支 serum 偏貴, 所以一直冇買嚟試過, 終於 4 個月前忍唔住襯 sale 時買咗, 已經差不多用完了, 又係時候寫個用後感 😉


產品資料 →

晶鑽保濕修護精華素
Extra Repair Serum

具保濕及修護功效 2 合 1, 成份蘊含 ER 複合物, 能刺激骨膠原增生及加速細胞更新, 大大提升肌膚的平滑緊緻度, 當中的橄欖油 + 白芒花籽油 + 植物萃取 + 角鯊稀, 更能提供高度保濕及抗氧化效果, 有效改善肌膚保濕度 + 預防肌膚衰老。

適合 dry skin 乾肌用~


$980 / 30ml @ Bobbi Brown



屬乳液質地, 質感頗稀身 →

可早 / 晚使用, 帶點薰衣草 + 佛手柑 + 伊蘭伊蘭氣味 🌱🌿


伸展度高, 少少份量已能推得遠遠 →

夏天用 / 皮膚唔太乾嘅人, 每次用 1 泵份量已足夠~

不過好似我呢啲連夏天搽少日 skincare 都會乾到甩皮嘅 "人乾" 呢, 就每次要用 2 泵先夠, 如冬天用仲可能要 3 泵.....


用後感 → 

呢支 serum 本身質感係偏潤的, 唔算快吸收, 唔太乾嘅人用甚至會覺得油膩, 搽完會有層油光, 所以唔係 dry skin 就千萬唔好用佢了, 要對號入座。

至於我呢類 "人乾" 用呢, 搽完都會有少少黏稠感, 但廿秒左右就吸收晒, 雖然都留有丁點油光, 但就完全冇阻礙化妝或阻礙其他後續䕶膚品吸收, 對我呢啲 "收油中女" 嚟計, 反而有丁點光澤感仲好, 如望上去乾爭爭睇落會仲顯老~ 😊

保濕度方面係好充足, 可以用滋潤形容, 持久度亦唔差, 但都要視乎你皮膚有幾乾, 如果好似我咁乾, 就可能會搽完仍覺得未夠潤, 要另外再搽其他 serum 或面霜 ; 普通乾的話就只搽呢支 bobbi brown 都好足夠~

(FYR 我每次係用 2 泵, 份量可因應季節 / 皮膚有幾乾而加多減少)


建唔建議買呢?

差不多用完一支, 係除咗覺得夠潤 + 有撫平咗啲乾紋 + 提升咗光澤之外就冇其他了, 膚質未稱得上有特別明顯轉變, 咁效果都係 ok 嘅, 至少產品描述所講嘅佢都做到晒, 但就真係貴咗啲! 💸

其實滋潤 + 減紋 + 提升光澤感呢啲功效咁普遍, 好多 serum 都做到, 除非好愛 Bobbi Brown 啦, 否則我覺得可試試其他, 話晒佢成千蚊支都幾貴!

3 則留言:

  1. 如果皮膚較乾又易敏感 有咩serum 同 cream 介紹? 成日都出油好麻煩|-|

    回覆刪除
    回覆
    1. 同埋網上好盛行既家用水光槍好唔好用== 怕伏啊。。

      刪除
  2. 你啲評語真係好中肯!!

    回覆刪除