精華都係爽膚水之後用的吧?
冇錯係~ 不過今次 Covermark 新出嘅「肌原修復精華凝露」呢, 就有少少特別, 係洗面後搽爽膚水之前用的~
咁得意??
係喎! 呢支 serum 仲啱啱攞咗日本 COSME 2019 年新品最佳精華第 3 名𠻹! 🥉
介紹下順便分享用後感先 😊
先睇睇官方介紹 →
肌原修復精華凝露
Moisture Charge Serum
著重調理及重塑角質層新概念!
蘊含獨有專利成份 "Chitosan spread gel" + 活性成份 Moist Nano Capsule (滋潤納米膠囊) + 多種香薰精油 + 蜂王漿萃取 + 人參、當歸及靈芝等 7 種珍貴漢方精華, 透過 "膠囊滲透技術" 逐漸釋放保濕成份, 能有效使養份滲透至肌底, 為角質層提供水份, 並能牢固地粘合顆粒層中的細胞, 瞬間修復角質層, 從內到外滋潤肌膚, 使肌膚變得豐滿柔滑。
每天潔面後直接使用「Moisture Charge Serum」, 然後才用爽膚水及其他䕶膚品, 有效瞬間滋潤肌膚, 穩定肌膚狀態, 改善肌膚粗燥問題, 從肌底煥發健康的細胞生長環境。
$630 / 40ml @ Covermark
(trial product sponsored by Covermark)
至於點解會有呢個「調理角質層」嘅 concept?
成日聽到人話要勤用洗面膏 / 每星期磨砂去角質去死皮, 好似講到個角質層係冇乜用處咁......
你見我好少介紹去角質產品就知, 邊有咁多舊角質死皮要清呢? 過度勁洗反而仲會令角質層受損, 令皮膚更乾更 sensitive 呀! 😨
角質層其實係比我哋想像之中脆弱, 好易受外來影響, 例如紫外線 / 溫差轉變 / 唔夠瞓 / 過度清洗等等, 都會令佢受損, 於是就引伸至上妝唔貼粉 / 皮膚又乾又粗糙 / 紋理明顯 / 皮膚狀態時好時差, 搽極 skincare 都唔吸收嘅問題了.......
所以如果肌底係床褥, 咁角質層就等於床單, 都好重要㗎! 如果張床單係平滑嘅, 望上去固然靚 ; 但如果張床單係皺嘅, 就自然會影響外觀, 當然要好好護理佢啦~ 😉
至於點樣護理角質層?
要供養角質層, 我認為敷 mask 係最徹底嘅方法, 但大前提係要好勤力經常敷, 甚至係每日敷 😓
另一方法就係善用精華油, 又或者每晚臨瞓前厚撻 night cream 或 sleeping mask 瞓過夜。話明要「供養」, 就唔會係求其薄搽啲嘢就 ok, 眨下眼都吸收咗啦~
不過對我 work 嘅方法當然未必人人合適, 怕油膩 / 懶敷 mask 的話, 咁就可以望望今次介紹呢支 Covermark, 始終係方便啲嘅~
透明 gel 狀質地 →
可早晚使用, 每次用 1.5 泵份量已足夠, 下圖係 3 泵 (唧多咗) 😅
輕輕按壓印上面會有助吸收, 印多幾印會變為水狀, 滲透速度頗快 →
我塊面微絲血管易擴張易泛紅, 屬於搽乜吸乜嘅 skin type, 皮膚長期勁乾鎖唔到水, 連夏天搽少啲嘢都會甩皮, 早已習慣用上述方法s 無間斷供養角質層, 所以還 ok 唔係太差。
試用咗呢支 Covermark 3 星期, 即時感覺係有啲補濕, 有啲舒緩, 搽勻後會見到紋理平滑啲, 飽滿啲咁, 就類似搽咗支輕薄嘅 B5 gel, 不過吸收得好過 B5 gel。之後再拍爽膚水亦吸收到, 唔會因為搽咗呢支 serum 而 block 住。
我角質層情況未算好受損, 用咗佢唔覺有好大相差, 直至早幾日......
去咗打「微針膠原槍」, 咁有幾多微針拮落塊面, 當然會又紅又有損傷啦, 係紅到關公咁。閉關 2 日狂敷 mask (每日敷 4 片) + 狂搽呢支 serum (每敷完一片 mask 就厚搽), 唔知關唔關事, 第 3 日後已經回復正常水平, 未好返晒但至少出得街先 😝
所以覺得佢都係有用處, 但皮膚粗糙或角質受損的人用, 效果先會較為明顯, 皮膚靚靚去用佢可能就只會覺得補濕咗咁~
沒有留言:
發佈留言
注意：只有此網誌的成員可以留言。