傳說中的「好酒好蔡」私房菜

今次想 share 的內容比較特別!

上星期護膚品牌「ERNO LASZLO」的總裁由紐約訪港，舉辦了 private luncheon 聚會，我有幸能成為席上客，與一班專欄編輯共盡午宴，試到城中馳名的私房菜餐廳.....

就這家聞名國際、傳說中的「好酒好蔡」→

這家於中環新開不久、上晒電視雜誌、所有食評都話佩服、粒粒巨星爭住幫襯、連碧咸都指定要去、被喻為 "神級私房菜" 的餐廳，究竟係咪真有咁神?

我見網上篇篇食評都係讚的居多，不過寫的全是專欄記者，而普通人食評則寥寥可數，確實神秘。原因好可能與收費有關，除非見客開公數，否則一般人如我，應該就不會隨便貪得意走去試，食評也就不多。

所以我今次想 share 的，就是對「好酒好蔡」的食評。

我並非食評家，當然寫不出專業水準，純絮以普通人心態分享一下~

其實邊間餐廳出名、邊間有米芝蓮幾星，我真係好少留意。婚後兼有小朋友的女人都這樣吧? Social life 少了，撐檯腳機會少了，人自然對食方面變得冇要求，食到好的一餐會感恩、食杯麵亦覺得滿足。

不過當老公及朋友們知道我有得去食「好酒好蔡」時，都驚叫話我有口福，仲不停問我究竟點? 好，我會盡力嘗試寫一篇~

「好酒好蔡」來頭有幾猛?

只要一睇它們的 facebook 專頁，即刻明晒! 

https://www.facebook.com/howardsgourmet/

美籍廚師 "蔡昊" (蔡老師) 是廣州著名的廚藝大師，2005 年在廣州開設了第 1 間「好酒好蔡」，從此震憾了整個飲食界，被廣泛報導，今年年頭則於 HK 中環區增設了第 2 間分店。

他的烹煮方式出名在創新，以科學思維掌握食材溫度，煮出最能保留食物鮮味、別樹一格的精緻中菜，而且仲會不停將煮法 upgrade。

HK 捧場客有鐘楚紅、發哥、林青霞、嘉玲姐、梁朝偉、Sammi 等等等等，幾乎你數得出的巨星 / 名人都有慕名幫襯過。

而外國代表就有萬人迷碧咸! 碧咸在廣州已經有去食，之後仲有請蔡老師到英國為他煮家宴! 上次訪港一落機，第一步都係去「好酒好蔡」食飯。

真係好似好神，不過究竟有幾神?

先望望我當日的餐牌 →

Menu 是每次不同的，會視乎當日有什麼新鮮食材而決定，冇自選菜式，冇散叫，餐牌 set 好係咁就咁，冇得揀，這點跟部份私房菜一樣。唯一不同的是，「好酒好蔡」景觀確實一流，可以望住維港境食飯，裝修亦超級 grand，有豪宅 feel，service 亦當然不會差。 

價錢方面最神祕，餐牌係冇價錢的! 未到埋單一刻都唔知幾錢?? 好驚....

一諗到咁多名人巨星幫襯，再加埋過千萬裝修 + 維港景，應該唔會平....

網上據聞晚市收費每位 $2000-$3000，仲未計酒水，都要預早 1 個月先 book 到! (omg! 一圍檯咪要兩三萬?) 而午市就每位 $1000 幾，又係未計酒水，真係好貴....

又咁諗，以普通食餐飯計當然超貴，不過如果以見客計、公司攪 function 計、或慕名而去的計，那就另作別論。

開胃菜「時令小菜兩款 + 暖胃湯」 →

所謂時令小菜，即係次次不同，而當日的就係札肉雲耳 + 菜苗肉粒。

杯暖胃湯超好飲! 

兩款小菜亦鮮甜，味道較清淡 + 口感軟稔，其實唔差，只係傳媒講到咁神之下，我好自然有期望，所以認為只屬普通，而且切得比較細粒，用筷子逐粒夾真係好考 "夾功"! hahaha~

(不過要優雅地慢慢食才是重點吧~)

全部菜式都的的式式為主，上菜速度如同婚宴酒席那種，唔預返 3 個鐘唔好去、不適合肚餓時去、大胃口的亦不適合去 (細碟呀)。

頭盤「一口香」→

應該是 "炸紫菜天婦羅鰻魚"? 呢碟有驚喜! 

完全不覺油膩，又脆口又有鮮味，點埋汁仲酸酸甜甜辣辣，好開胃! 勁想 encore!

招牌主角「脆皮婆參」→

外邊皮脆、裡邊煙韌、冇加調味料，只靠上湯配襯、食到原味而零腥味，的確同平時食過的唔同，係勁既! 我本身並非海參 fans，都真係覺得好好味!

另一招牌主角潮州名菜「青欖燉螺頭」→

這道湯味道比較濃，略嫌有點咸，而螺頭及青欖就燉得好稔，食落去已經冇味，味道應該已出晒入湯裡邊。

配角「薑汁海上鮮」→

這道同樣屬軟稔口感一類，咬落去冇乜 texture，味道亦較淡，雖然係好講個人喜好，但我就認為普普通通唔夠特色。

另一配角「肉末燉波菜」→

即等於上湯波菜。雖然已經係 menu 內第 3 道有湯的菜式，但個湯真係好味到我飲完之後、直頭想偷埋隔離個碗飲! 

波菜亦已經燉到入晒味，超正~

不過喔.... 話晒咁貴一餐飯，好似普通左少少....

皇牌主食「酸辣麵」→

我一向麻麻地酸辣麵，但呢碗食過真係會回味! 唔係普通酸辣、係有少少麻辣，唔會太酸，好喜出望外! 自製的麵條又夠彈牙~

好可惜..... 去到呢一步我已經飽左，食幾啖就放棄了.... 

雖然話款款細細碟唔算食得多，但呢個 "優雅的午餐" 上菜速度真的較慢，去到呢碗酸辣麵時，已經坐了 2 個鐘，因為食得慢，個胃已經呆滯左。

不過真心講句，又真係好好味既!

甜品「薑薯芋泥」→

呢碗我真係麻麻.... texture 麻麻，好似糊仔溝糖水，有少少唔知自己食緊咩....

整體計 :

以接近 $2000 蚊價錢 x 我普通人心態，好可能會 expect 食到更多海鮮 / 貴材，而 menu 內其實好多都只係普通菜式，大家 get 到。

其實咩叫食個環境、食個情調、食個大師級製作、食個 level 等等我係明，年輕時我都曾經豪食過 (而家有家室當然要轉食杯麵啦)，不過我真係覺得佢冇所講般咁神，唔係差，但一半半好，真係可以講係食個 level，食完等你有得 show off 試過那種.....

我係好欣賞 + 敬佩蔡老師的廚藝 concept，亦感恩能有福被邀一試蔡老師手藝，好可惜我唔係專業食家，只能以自己對食物的個人喜好來個笨拙的分享了。