又搬屋!

係呀! 又搬屋!~~

我真心覺得自己的遷徙命運係流於血內! hahaha~


So far 的搬屋歷史，有好多仲要係同區:

油麻地 → 油麻地 → 油麻地 → 火炭 → 元朗 → 元朗 → 元朗 → 馬鞍山 → 美國 → 美國 → 西沙 → 馬鞍山 → 跑馬地 → 中半山 → 北角 → 北角 → 北角 → 西沙 → 中半山 → 北角 → 黃埔 → 紅磡 → 黃埔 → 元朗 → 黃埔 → 馬鞍山。

平均每 1-2 年搬一次，真係搬到驚，而今次係搬去大圍。



細個就話冇得揀，大人搬就跟住搬，主要係因被收樓重建、家人有宿舍、媽咪再婚、父母鐘意轉換新環境、方便養狗而搬村屋、方便繼父就醫而搬近醫院、方便繼父養病而搬去空氣好的地方、繼父離世後又再跟媽咪搬過 N 次等等。

到後期廿幾歲時，又因愛心爆棚的媽咪養了 6 隻狗，而引起我的嚴重鼻敏感，於是就自己搬出去住，期後因遇上樓市租金加升，收入不高就唯有不停搬，搬多幾次之後仲搬埋返屋企。

估唔到婚後又經常因另一半鐘意轉換新環境、被業主收樓自住或瘋狂加租、離婚、再婚、為小朋友想搵空間大少少的地方等原因而不停搬..... 今次馬鞍山住了 3 年已經算耐，我同老公都好鐘意呢一區，加上大囝已經於同區讀緊小學，本來冇諗過要搬。

但話說奶奶屋企樓下親友有層樓租緊俾人，而奶奶一直都好想我地搬過去，講左 1 年之後我地最終決定又搬過，始終有 2 個小朋友，同家人住樓上樓下有個照應會更方便，都係為下一代著想。

屋租係之前一直擔心的地方。不斷問親友幾錢租? 都係笑住答 "自己人得啦得啦"，而問奶奶就答 "唉呀，幾錢都搬啦，唔會貴得過你住緊個度啦"..... 咁樣。好謎。

雖然係舊居屋，但因屬大單位，上手租客租開萬三，我同老公都認為好似慳唔到幾多，而家租緊個度係私人屋苑新樓，雖然貴 d，但本身包晒雪櫃 / 冷氣 / 洗衣機電器之類，居屋就乜都冇包，點都要使幾萬重新買過，仲要花錢裝修，好似支出好大，唔搬好過搬? (不過應承左就梗係 must 搬啦)

直到今個月收樓，望穿秋水，終於開估喇!

親友超好人地只收我地幾千蚊租，更花了廿幾萬拆過成間屋重新裝修，而家有晒靚靚組合櫃、廁櫃同廚櫃，奶奶仲已經買埋雪櫃 / 冷氣 / 洗衣機! 果然世上只有媽媽好~ 睇來奶奶真係 plan 好晒，好想我地搬過去~ hahaha~

不過新屋始終細過舊屋少少，屋企雜物又多，要諗諗搵邊個新位拍 video 先~

今星期尾搬屋，而家開始瘋狂 pack 箱中，以前都仲話有個 "超級馬莉奧 level" 能幹賓賓姐姐幫手，今次搬屋 pack 野，新賓賓嬸嬸係坐低嘆茶望住我執個隻，叫佢幫手就滋滋油油要催幾次，我一行開佢就停手個隻，好想死。

但為左等出年可以請返我個舊工人姐姐 (佢同新僱主未完約)，如果我呢一刻換新工人 timing 就夾唔到，唯有忍多而家個賓賓嬸嬸 1 年啦，忍忍忍忍忍.....

而心裡邊就一邊執一邊咀咒我老公，做乜上年要貪新鮮換走跟左我好多年個 "陪嫁工人姐姐"，話請個年紀大 d 好 d 喎。不過算啦，我已經知道佢有說不出的後悔。(都唔知我應該奸笑定苦笑好)