單身獨居女孩租樓搬屋分享

早幾日收到的留言 : "不如搵次分享下搬屋, especially for single girls who are new to this topic. 雖然有自己做 research, 始終冇經驗, 好想聽下你分享"

其實單身獨居我只有幾年時間，唔算有太多經驗可以分享，只不過就搬過好多次咁，我盡量。


揀屋方面 :

女仔特別怕黑，所以我一定會揀多窗、陽光充沛照到入屋的，一入屋自己要覺得舒服個種，最緊要洗手間夠企理。而獨居揀的地點亦偏好熱鬧少少 / 有人氣的地方，例如近大街，萬一夜返都唔怕太靜太黑。如有任何一 part 唔合心意都唔會揀，揀唔中會寧願再睇多幾間，最緊要唔好怕煩，揀到合適為止。

揀中之後，我亦會要求望多 1-2 次先租，分別係日間去及晚上去，睇睇屋內日夜分別係點 / 嘈唔嘈，並留意附近環境有咩人出入。租的一刻要打開廚櫃 / 廁櫃望望有冇爛、電器係咪正常運作、間屋有冇漏水、冷氣 work 唔 work、夠唔夠凍、有冇滴水等等，記得要求業主洗冷氣。

另外 in case 你首次搬屋唔知道，租屋需一次過付 1 個月屋租 + 2 個月按金，而地產 agent 費係屋租的一半，厘印費約幾百同業主 share 一半。現在的業主好多時會需要你提供收入証明及卡片，check 完先肯租。

至於水電煤就可以試下同業主傾，睇下可唔可以唔轉名，只截日期交自己個份，慳返水電煤 deposit。不過如日後打算申請 credit card 之類就唔適合，始終要有水電煤住址証明。

搵屋最難忘經歷 : 

試過簽完臨時約後，第 2 間地產 agent 八卦問我租左邊，講完先知係兇宅，而因為租屋個 agent 冇講，打去問先話漏左講 (擺明隱瞞)，即時 xyz 再解約。

女仔獨居別貪平租套房 :

除非係獨立門口有埋鐵閘 / 新式有管理 / 有閉路電視的 studio flat，否則真係好危險。我有男仔 fd 以前租過銅鑼灣區套房 (一道鐵閘裡邊再有幾道木門分戶租出個種)，試過被人連爆 3 次偷野。財物損失事小，人身安全事大。

搵搬屋公司 :

如果係第 1 次搬出去住，大部份傢俬 / 電器應該都係新買，照計會有送貨 service (可能要加錢送貨及安裝)，自己的 belongings 可能只係 3-5 個紅白藍膠袋，咁其實 call van 搬 / 搵朋友幫手搬 / 再慳 d 自己每次逐少搬去新屋都得。

In case 你有好多傢俬要搬，也附上我近 10 年搬屋 / 搬 office 常用的搬屋公司 contact : 啟聰搬運 6773 3206 (認為他收費合理，搬得夠快，有交帶夠妥當)

最難忘搬屋經歷 : 

試過獨居時貪平上網搵左間所謂搬屋公司，其實係得一個人加個 fd 個種，完全唔識得拆櫃拆床，仲要一副 take 完野既樣開工 (我指係真係 take 完野)。之後仲賴死唔走，問我去唔去唱 K! 真係嚇餐死。

唔想自己買咁多傢俬電器?

揀樓時可同 agent 講明要有包雪櫃 / 洗衣機之類的，另外也可於 FB 問問朋友有冇唔要的物資捐獻，部份 FB page 亦有好多人搬屋將唔要的物品送贈。(當然如果有 budget 也可以自己買)

以我為例，獨居時會專揀有包雪櫃 / 洗衣機 / 冷氣 / 甚至上手有剩低少少傢俬的樓，傢俬唔合適可以問業主掉唔掉得，點計都買少好多，其他就 Ikea 攪掂，一次過送貨唔使煩。

搵裝修 / 水電師傅 :

正所謂 "出外靠朋友"，如果只係新屋要鑽牆 / 砌櫃呢 d，最好搵朋友幫手，又或者搵朋友陪，盡量唔好單獨同裝修師傅獨處一室，點計都係陌生人。

我曾經遇過 take 野開工的裝修師傅，又遇過整完野唔走、少少野分幾次上來整、問長問短搏識女仔的師傅 (知你獨居嘛)。雖然都遇過好多好師傅，不過穩陣 d 都係搵 fd 陪住好。

一定要換鎖 :

也可以只換鎖膽，總之唔好貪方便用返上手租客用過的鎖，門內亦要加防盜鍊，安全至上。

記得配 1 條鎖匙俾家人，再配多條俾 best fd，有咩事可以有人開到門。自己就要配 2 條匙，一條放手袋，一條放銀包 (唔使 key chain)，萬一唔記得帶鎖匙亦至少有後備。

防盜窗花就算唔靚都唔好拆，安全 d 好。

屋企一定要有的物品 :

- 基本急救物品及藥物

- 電筒及 candles，in case 停電 / 跳 fuse (如果跳 fuse 唔識處理，可問定地產 agent / 裝修師傅教你點啪掣，其實好易)

- 小強噴霧 / 小強屋 / 拖鞋 (用來拍小強) 呢 d 係 must ，遇上時記住唔係佢死就係你(嚇)死，請勇敢面對同佢死過

- 有 alarm 的防狼匙扣，萬一有事一拉會響到拆天個種