bareMinerals 新出「SKINSORIALS 礦物護膚系列」3 件產品 review

早陣子收到 bareMinerals 幾件新出的「SKINSORIALS 礦物系列」護膚品，so far 試用了約 3 星期，又係時候寫個 review~

有 blog 友問我點解 review 出得咁慢呀? 好想快 d 知道各牌子新出的 skincare 好唔好用..... 

其實我都差不多每日 / 隔日寫一次 blog 了~ 不過大家都知護膚品唔會用幾日就見效 (都有少部份會的)，始終要試耐少少，加上我自己有用開的 skincare，唔會話一收到新產品就掉低晒自己用緊又鐘意個 d，有新品都係逐少加入 skincare routine 內試用咁，所以的確會介紹得慢少少，通常都要用 3-4 星期後先介紹到~

就咁試 2 日就出篇文唔係叫快，而係叫 hea，對大家都唔係咁好啦係咪?~ ^^

今日想介紹的 bareMinerals 新出「礦物淨化潔膚泥」→

講真，bareMinerals 的礦物粉底妝品我一向麻麻，以前在美國已經用過。"化妝同時護膚" 的 concept 係好好，我只係認為礦物粉於 HK 潮濕天氣下用一般般而已，自覺它的 skincare 反而比化妝品更好用，而且價格亦相宜~

今次呢支「礦物淨化潔膚泥」成份除蘊含豐富鈣、鎂及鉀的礦物海鹽外，更含有富含天然礦物質的巴西紅泥、富含維他命及礦物質的木瓜、竹子萃取物、佛手柑及橘子等，有效深層清潔毛孔，排走污垢及毒素，潔淨並提升肌膚清透度，改善肌膚彈性及增加肌膚抵抗力，同時有助舒緩壓力。    

臨床實證，99% 女性用後認為肌膚看起來更健康；98% 女性認為有效去除污垢；96% 女性認為使用後肌膚變得更年輕美麗。

$190 / 120g @ http://bareminerals.com.hk/?lang=zh-hant

顏色同一般潔面膏唔同，因為加入了巴西紅泥，所以係啡紅色的 →

用法 : 

1. 取出約一毫子大小份量搽於乾爽的臉上，按摩幾秒

2. 加少少水打圈按摩，直至紅泥轉為白色霜狀，再用沾濕的指尖繼續按摩

3. 最後以暖水潔面

因為要先 "乾手乾臉" 搽上，假如份量太少又好似唔夠推開，但手心呢個份量係多左，可以減返少少。

未加水前係啡紅色泥狀，加少少水按摩後會慢慢轉化為白色乳霜，可同時將污垢帶走。

(按摩十數秒已 ok)

洗臉後 →

由於屬無泡性質，洗臉後完全唔覺得乾，反而仲幾滋潤補濕! Dry skin 用會唔錯，不過油性肌就未必鐘意了。

另外佛手柑 + 橘子的天然香氣亦非常討好，感覺好 relax~

有冇覺得特別乾淨? 咁又冇喎.... 我都有用過一 d 好深層潔膚的 cleansing 產品，對比起上來，呢支 bareMinerals 並唔算深層清潔到毛孔，但勝在真係一 d 都唔乾，洗完臉唔即時搽 skincare 都唔會覺得繃緊，同埋 $190 大大支咁。

輪到同系列新出的「礦物全效卸妝油」→

成份蘊含有淨化及重整肌膚效能的礦物海鹽、有助柔軟及滋養肌膚的天然植物油如琉璃苣油、保持肌膚水嫩彈滑的青瓜油、蘊含豐富維他命及奧米加 9 的太陽花油、有效改善肌膚柔滑度的山桑子油等等。

輕盈無重質感，加水後即轉化為乳液，可輕易卸除任何臉部及眼部彩妝，不會留下油膩感，適合所有肌膚使用。

$250 / 180ml @ http://bareminerals.com.hk/?lang=zh-hant

So far 用了接近半支 →

薰衣草 + 橘子的天然香氣夠清新舒壓，有做 spa 的氣味~

用法 : 

1. 按壓約 3 泵於掌心中，並於面上按摩溶化化妝品

2. 再加少少水以沾濕了的指尖輕輕按摩

3. 當卸妝油乳化成奶白色後，即可用清水潔面，再用其他潔臉品洗臉

質感屬於輕盈無重、稀身清爽、零油膩感一類 →

個人極討厭質感厚杰的 cleansing oil，呢支 bareMinerals 質地我係覺得唔錯的，清清爽爽，氣味又認真一流~ 

卸妝潔淨度方面亦 ok，除了 mascara 要洗耐少少先甩之外，粉底 / 遮瑕膏 / 胭脂 / 唇膏個 d 全都好快卸得乾淨，幾好幾好~

最後係 Oil-Free 不含油份配方的「礦物強效保濕啫喱」→

產品資料 : 

透過專利Intuitive Mineral Moisture™ Technology保濕因子修復技術，由胜肽混合物 (Peptides Blend) 及份子酊 (Ceramides) 所組成，更具有肌膚天然保濕因子、氨基酸、海藻萃取物等，有助補充水份，柔滑粗糙肌膚，維持肌膚彈性及飽滿度，並提升肌膚透亮度並重塑細嫩膚質，預防肌膚老化。

輕盈彈滑質感，不含油份，即時提供清涼及強效保濕，改善水油平衡。

$280 / 50g @ http://bareminerals.com.hk/?lang=zh-hant

用法 : 

可早晚使用，直接塗於臉部及頸部，適合任何肌膚，特別適合油性肌膚 / 喜歡清爽感覺的人，另可用作曬傷後急救用。

整個「SKINSORIALS 礦物系列」的護膚品氣味都極討好，如呢盒補濕 gel 就混合了天然佛手柑 + 尤加利氣味，搽完後都聞到肌膚留有淡淡香氣~ 

簡單的說，呢盒純粹係補濕用途~

由於產品講到明係 oil-free 配方 + gel 質地，針對油性肌 / 鐘意清爽感覺的人，所以未用前我仲以為佢會係好清爽、搽完好似冇搽、唔夠補濕、唔適合我這類收油中女用個 d。

點知用後又唔係喎!

其實搽上臉時已經 feel 到好補濕柔滑，搽勻之後隔左好耐都仲好補濕喎!? 

搽完吸收後雖則唔反光，望落又好似冇搽過野咁，但真係幾補濕! 有層膜包住咁 →

直頭有 d 似 NARS 盒皇牌 Aqua Gel! 

(不過 Aqua Gel 香味太重，冇用好耐喇，加上改了 formula 後冇以前咁好)

雖然未至於話好似 cream 咁滋潤，但夏天我乾性肌夜晚都用到，若果嫌唔夠潤都可以局部搽多層，當埋 sleeping mask 咁敷過夜。

咁如果依照產品建議咁講，俾油性肌用又似乎..... 補濕左 d? (份量用少 d 啦唯有)

應該混合肌 / 中等偏乾的人用會更好~