學員堂上作品分享

又一班高級化妝師班畢業喇!

眨下眼呢班已經係我半退休前尾二的一班小組班，今次同學仔s 的堂上作品我亦好滿意! 

雖然唔可以話完全 perfect，幾時都會有進步空間，但我同 Cindy 老師都一致認為，大家可以於短短 1.5 小時內做到咁既效果，已經做得好好、好好喇~

見到一班學生化得靚，仲開心過自己化得靚 ^^

至於點解要半退休....

唔係唔做唔教~ 只係一直都提過想教少 d 小組班，俾多少少時間陪一對囝囡，另外始終改為一對一  / 一對二教授，對自己同學員來講都可以更專注~

Makeup & hair by class students @ Makeup Secret 專業化妝師課程

另一個唔再教小組班的原因，就係而家 d 舖租實在太貴了。

教得小組班，地方就一定要夠大，租金當然成正比，尖沙咀 700 呎地方冇兩三萬租金唔使諗。為交租迫自己開多幾班我又唔想，亦從來唔會迫同事跑數或迫學生報名，大家舒舒服服冇壓力、開開心心學化妝就最好啦~

而唔再教小組班，將來就唔需要租咁大間 office，約滿後可以揀租商場舖 / 樓上舖，繼續幫一班畢業化妝師接 job，冇咁大壓力，又可以陪多 d 小朋友，皆大歡喜~

事實上有好多化妝學員都係在職媽咪s，希望有朝一日可以 quit 正職，陪多 d 小朋友，同時又可以有份收入幫補，唔需要完全依賴另一半咁，其實諗法都同我差不多~

仲有一個半退休原因，當然係因為現時的化妝班太泛濫。

剛剛學完就走出去教人的例子屨見不鮮，奇就奇在原來真係可以行得通，係因為學費平? 

又講真，除非你學過化妝又識睇妝，否則學都未學又真係好難分好唔好，見妝相好似影得幾靚就 ok 啦? ..... 我都唔識點評價呢個現像好喇....

人家花十幾萬讀完化妝，收你幾千學費、將累積十幾年的經驗傳授俾你，轉個頭被照抄資料出去教人，個種心情真係難以形容，所以有時都會覺得好氣餒..... 

另外又有聽過有人覺得我化妝收得貴....

(唔係嘛? 唔係嘛? 唔係嘛? 太打擊我自信，哈哈)

貴唔貴 / 值唔值係好見仁見智，我從來唔覺得自己收得貴，係因為以資歷計 / 以同級化妝師計，我已經算收得平，累積的經驗同資歷全部得來不易，都有血有汗。 

平心而論，我的徒弟們新娘化妝 full day 出面都收緊 $7000-8000，難道叫我收 $6000? ....

徒弟化得好，老師應該都不會差，只能說懂的自然懂.....

廢話完畢，講返今次學生們的堂上作品~

雖然 detail 位係未夠好，有 d 位係可以再整得靚 d，不過以短短時間來講，我覺得已經算唔錯，其他就唯有練妝時再執仔細 d 吧~

專業相影出來當然特別有純美無瑕風，而鏡頭後自拍的花絮相亦另有一番感覺，比較真實 / 自然~

我甚至覺得真人睇仲靚~

同學仔s 話咁快就畢左業喇..... 

真係有 d 唔捨得.....