遊日本藥妝店「驚安の殿堂」化妝護膚好物分享 2018 春夏 review

由大阪返咗 HK 一星期，終於的起心肝寫呢篇，實在太多相、太多字有排寫，結果又寫足 4 晚 😬

3 個月前先去完東京，咁快又再去大阪只因老公好鐘意日本，加上年尾生得，襯而家仲行得走得又剛好有 4 日假唔使教班就起行了，順便去買吓童裝同 BB 嘢~

上次去東京買咗一堆化妝品 / skincare，部份到而家都仲用緊，所以今次去大阪只係 "小出血" 盡量揀實用嘅嘢買 (反而童裝就買咗一喼) ☺️

上次東京分享重溫 : 中女版之「遊日本必買藥妝店 好物推介 review」2018

日本專櫃妝品分享重溫 : 中女版之「遊日本 高島屋 / 伊勢丹 專櫃化妝品推介」2018

底妝品

介紹「驚安の殿堂」好物之前，先快快地推介 2 件專櫃底妝品 →

原先去咗轉 "高島屋" 想買 SUQQU 之類專櫃品，點知撞啱個個 counter 都人山人海迫滿拖喼黨，行都行唔到咁滯，淪陷情況有如 SOGO 感謝週，買嘢要攞籌排隊等最少 1 個鐘，真係好顛! 😖

所以最終我放棄咗，回程時响機場買咗 Covermark 同 RMK 就算數..... 

Covermark「Day Nourish Fixer SPF20 PA+」保濕妝前打底液，過往都推介過幾次 →

蘊含磷脂聚合物、滋潤細胞份子、鎖水份子，能於皮膚中將水份及油份結合，於肌膚表面形成高度透氣薄紗，鎖住水份防止蒸發，令肌膚平滑柔軟、粉底更貼面持久。不含任何香料。

￥3600 / 50ml (約 HKD 256) 

HK 專櫃賣 $360 左右，日本買係平好多! 鐘意 Covermark 嘅朋友唔好錯過 ☺️

個人認為响機場買專櫃貨品會更方便，好過去百貨公司要排隊退稅，又唔使規定要買滿 ￥5000 先有得退稅~

以 Covermark 計，我覺得最好用嘅係:

Moisture Veil 柔滑美肌粉餅
Sheer Powder 保濕填毛孔碎粉
Moisture Clear Base SPF35 PA++ 有色妝前底霜
Brightening Up Foundation 遮瑕膏

而呢支「Day Nourish Fixer 皇牌保濕 base」係我教化妝班上堂一直用開，貪佢質感輕薄人人啱用，用完上粉底又貼面啲 🌟

RMK「Gel Creamy Foundation」水凝柔光粉底霜 SPF24 PA++ →

蘊含蜂皇漿精華及透明質酸等保濕成份，能長時間鎖水保濕。結合啫喱及霜狀粉底優點，並加入能吸收多餘皮脂的粉粒，質感輕盈並具高度修飾力，能緊貼肌膚帶來貼服妝感，令妝容整天持續完美透亮狀態。 

￥4750 / 共 7 色選擇 (約 HKD 338) 

HK 專櫃賣成 $480! 梗係去日本買啦 ✌🏻

呢支粉底又係我教化妝班用開好多年，好多學生上堂試過都有讚冇彈❣️

由於質地係 gel 混合 cream，冇 gel-based 粉底咁乾，又冇 cream-based 粉底咁潤，係好適合 HK 天氣用，混合肌 / 乾性肌用一流，遮瑕度又好 (屬中高)，以前都已推介過 💕

至於 RMK 仲有啲乜嘢好用?

我認為除咗支「Creamy Polished Base 妝前底霜」比較值得試之外，以前用過佢嘅卸妝油 / cleansing balm / treatment oil / 洗面膏 / 爽膚水 / eye balm / 眼影 / 胭脂 / 碎粉等等都冇乜特別....

輪到介紹「驚安の殿堂」藥妝店好物 →

全日本「驚安の殿堂」分店地址 :

http://www.donki.com/store/index.php?pre=le

雖然日本有好多藥妝店，不過始終都係「驚安の殿堂」多嘢睇啲，有 4-5 層高仲要 24 小時通宵營業勁開心! 😍

先講吓大家熟悉嘅「Sofina Primavista」→

年輕時代都用過好多 Sofina 護膚品，但過咗 30 之後就開始覺得用佢冇咩效果，加上而家又有咁多新牌子選擇，就算去到日本已經再冇嗰種 "非買不可" 嘅感覺......

反而佢嘅副線 Primavista 化妝品就仍然值得購買~

剛剛早幾日推介過 Primavista 嘅 makeup base :  

http://isadoracheng.blogspot.com/2018/06/sofina-primavista

而佢支皇牌「Long Keep Base 控油底霜」最近仲推出咗升級版，控油度比舊版提高 130%! 好適合偏油皮膚夏天用 👍🏻

未用過想試吓又唔想買咁大支的話，「驚安の殿堂」仲有細 size 限量體驗裝出售 →

只係 ￥1000 咋! (約 HKD 71) 😍

另外 Primavista 嘅 "防曬粉餅" 有遮瑕度又唔算乾，而 gel-based 基底嘅 "Liquid Foundation 粉底液" 不但遮瑕度高，又好適合偏油至混合肌用，我以前用過都覺得唔錯，價錢又唔貴~ 

至於眼影 / 唇膏 / 胭脂 / 碎粉之類我就覺得冇咩特別......

Shiseido 平價副線「INTEGRATE GRACY」 →

剛剛前日介紹咗佢 2 款粉底，用後感重温 :

http://isadoracheng.blogspot.com/2018/06/shiseido-integrate-gracy

除咗粉底之外，佢嘅胭脂粉質亦好幼滑，仲要好平! 👏🏻

￥750 (約 HKD 53)

定妝碎粉亦值得一試，拍得住 Primavista / Coffret D'or 之類，但售價就平一半! 🙌🏻

本來好想買埋「INTEGRATE」呢盒新出 Water Jelly 粉底試，但佢好賣到我揾咗幾間藥妝店 + 3 間「驚安の殿堂」都 sold out，只剩最淺色的 #01 (我要嘅係 #02).....

oh well 有緣無份...... 😔

輪到 Shiseido「MAQUILLAGE」→

最鍾意响藥妝店試呢類專櫃 brand，任試任玩，試完唔買都唔使怕尷尬 😆

每次去日本一定要回購我最愛嘅 MAQUILLAGE「精華潤唇膏」→

又夠潤又持久，搽完好似搽咗層淡薄 lip gloss 咁，又撫平到唇紋，勁鐘意! 呢支已經係回購第 4 支 😍

HK 買約 $180，而日本買約為 $130-140 左右

呢支我係帶出街用的，而平常响屋企我係搽開 Burts Bee / 凡士林潤唇膏

自覺 MAQUIILAGE 大部份化妝品都好用又實用，顏色亦大路，如胭脂 / 眼影組合 / 唇膏 / 唇膏液 / 唇部精華 / 粉餅 / 粉底液等等，我用過都覺得唔錯，好值得試~ 

另外買咗 MAQUIILAGE 新出嘅胭脂霜，新到 HK 仲未有 →

￥2300 (約 HKD 164) 

係霜狀質地，唔會好似胭脂液 / 胭脂膏咁會令底妝溶化

用附設嘅海綿粉樸印上臉就得，都幾方便~

如果只印一層係淡色到冇嘢睇 →

印多幾吓就會見到色了 (印幾深色可隨個人喜好) →

好處係唔會太潤唔會溶化底妝，同時又冇胭脂粉咁乾，色效亦比胭脂粉持久，無論用响掃碎粉之前或之後都 ok 👍🏻

KISSME-FREME →

又係一個唔錯嘅日本平價開架 brand，主攻成熟肌膚路線，價廉物美夠實用，產品種類又齊全 

摸過佢嘅粉餅質量都好好，有遮瑕度之餘又唔乾唔厚，拍得住啲貴 brand! 👏🏻

不過屋企經已有 3 盒粉餅，所以今次就冇買佢了 

買咗佢嘅「Bright Cover Cream Foundation 高保濕粉底霜」→

￥1000 (約 HKD 72) 

屬 cream 狀質地 →

單係印上手已經 feel 到遮瑕度頗高 →

我買嘅係 #02 自然色 →

初初印上手都覺得顏色幾深吓，仲好似有啲偏橙，不過搽上臉又剛剛好喎~

不單止粉質夠貼，有自然光澤感又唔會油淋淋，摸上手亦唔黏笠，遮瑕度高得來仲要唔厚妝 (想薄啲可將份量減少)，大部份瑕疵都 cover 到，又好 long lasting! $72 有咁好質素真係不得了! ❤️

質地唔會過乾又唔太潤，好適合 dry skin 夏天用~ (但冬天用可能會唔夠潤)

唯一缺點係我有鼻敏感經常抹鼻，鼻位特別易乾 / 易甩皮，所以鼻翼位過咗 3 小時後有輕微乾到浮粉，但純屬個人問題。

真人睇屬半啞緻妝效，只係張相陽光太勁、又未掃碎粉定妝所以有啲反光 →

Baby Pink「CHIFFONGEL Primer」毛孔 base→

呢支外型似 lip gloss、細細支嘅妝前底霜，撫平毛孔 / 紋理效果一流! 售價又平~

效果仲好過啲貴價 brand 呀! 👍🏻  

￥1180 (約 HKD 84) 

雖則望上去有啲閃粉，但實際搽上臉唔會見到閃，完全係透明的 

但保濕度就冇乜，純粹係 blur 毛孔 / 紋理 / 妝前平滑肌膚效用，而凹凸洞就 cover 唔到，不過都仍算係一支唔錯嘅 base~

ShuShupa! Make Keep Spray 定妝噴霧 →

係一支 oil-free 嘅補濕定妝 spray，同時又可抑制油光，化完妝後離遠噴一噴，有效令底妝更持久。不含防腐劑 / 礦物油 / 香料。

￥1300 (約 HKD 92) 

買之前我都考慮咗好耐，始終呢類定妝 spray 曾經試過好多都冇乜效 (係得 Urban Decay 比較好)，怕買咗冇效又嘥錢.....

不過 so far 用咗幾日又覺得幾好喎! 化完妝後噴少少即刻冇咁乾，底妝又貼面咗，又係 oil-free 唔會令底妝溶化，效果仲好過 Urban Decay 😍

至於有冇令個妝持久啲?

少少啦，夏天計大概比平常溶妝時間延慢咗 1 小時，但不至於 keep 到全日唔溶妝，總括而言都值得試，價位唔貴~

眼妝品

K-Palette「1 Day Tattoo Real Strong Eyeliner 防水眼線液」→ 

HK sasa 都有賣 K-Palette 嘅眉筆 / 睫毛膏 / brow mascara / 眼線筆等等，不過就冇呢一款眼線液，呢支 eyeliner 主推防水防汗防油，仲話游水都唔會溶化咁犀利! 

￥1500 (約 HKD 107) 

屬毛筆型筆尖 →

同我用開嘅 MOTE Liner / Love Liner 眼線液筆尖大小 / 感覺都差唔多，冇乜分別，同為順暢易畫一類。

粗幼亦可以自行控制到 →

我買嘅係 #BlackBrown 黑啡色 →

不過室內燈光下睇似黑色多啲 😅

陽光下睇就見到係深啡 →

至於係咪真係所講咁防溶?

係就係全日十幾個鐘都冇溶過嘅，但卸妝前我試過用手指輕輕捽兩下就化開咗 (只係乾捽冇加卸妝品)，所以游水應該唔得喇，日常用就 no problem 😝

KOJI「DREAM MAGIC Natural Nude Eye Tape Transparent」單面式雙眼皮膠紙 →

呢款係之前有讀者推介我去日本買的，但上次去東京揾咗幾間藥妝店都唔見有，今次去大阪「驚安の殿堂」終於揾到! ✌🏻

但都行咗 3 間先得 1 間有呀

￥800 / 90 對 (約 HKD 57) 

屬淡膚色膠布質地，的確係比 HK sasa 買到嘅雙眼皮膠紙更透明、更軟身舒服，冇介紹錯 👍🏻

當然唔會有網紋貼咁隱形，但勝在唔使加膠水，一貼上眼就得夠快夠方便，以普通膠紙計已經算叫隱形了~

Heroine Make (KISS ME)「防水睫毛液」易卸防水膜配方→

呢 2 支 HK sasa 都有售 ($82)，仲要平過日本買 ($85)! 

蝕咗 🤣

 我買咗紫色盒 "濃密型" →

蘊含超級防護聚合物 + 豐盈分隔粉末 + 瞬間定型配方及形狀記憶聚合物 + 山茶花油 + 蜂皇漿萃取 + 堅果油 + 野玫瑰果油等修護成份，強效對抗汗水、淚水及油脂，效果濃密之餘有效分隔睫毛，令睫毛根根分明不會形成結塊，塗上後快速鎖定睫毛鬈曲度。

同時加入可被一般潔面產品溶解的成分，令睫毛液輕易卸除。

刷頭 size 剛剛好唔算太大，形狀呈微彎弧度，更貼合眼型 →

我本身睫毛偏重，唔係支支 mascara 都用到，試過好多款搽完後都好快 drop，有時難得遇到好用唔 drop 嘅 mascara 又往往好快 discontinue 唔再生產...... 

上次去東京買咗 2 支話銷量 No.1 嘅 mascara 都唔得，今次呢支 Heroine Make (KISS ME) 總算唔 drop 了! 效果仲要好濃密 😍

下圖為搽後 10 小時效果，仍然堅挺 hold 得住捲曲度兼冇溶化過 →

Shiseido #215 細 size 睫毛夾 →

大 size (正常 size) 嘅 Shiseido 睫毛夾 HK sasa 都有，但呢款專用嚟夾眼頭 / 眼尾睫毛嘅細 size 就只得日本先有了~

￥698 (約 HKD 50) 

呢類細 size 睫毛夾我曾經試過唔少牌子，但最好用嘅就只得 Shiseido 呢個! ⭐️

佢條膠條係特別軟身柔韌，夾得特別捲曲的! 

我工作上經已沿用 N 年，覺得佢係無可取代~

「驚安の殿堂」仲有 Shiseido 大 size / 細 size 睫毛夾膠條 refill 出售 →

睫毛夾用舊咗唔使買新，換條膠條就可繼續用~

￥98 一包 (約 HKD 7) 

温馨提示 :

- 睫毛夾要經常消毒，始終用得咁近眼，有菌 / 污污漕漕咁就唔係咁衛生啦

- 膠條會隨著時間硬化破裂，約 6 個月好換 1 次喇，否則好易夾斷睫毛

卸妝品

Bifesta 眼唇卸妝液好多人都用過，其實佢嘅「Cleasing Sheet 卸妝濕紙巾」都好好用架! →

最適合懶人卸妝用 / 旅行外出用，連 mascara 都卸得到，好方便! 👍🏻

不含香料

幾十蚊一包有 46 塊 →

雖然我唔建議日日用呢類濕紙巾卸妝，日日咁抹咁拉扯皮膚始終唔多好，但外遊用的確係方便嘅~

Kanebo 佳麗寶「Petit Garden」卸妝棉棒 / 妝容修改棒 → 

係浸咗卸妝液嘅棉花棒，用嚟修改溶咗 / 花咗嘅妝 (多數係眼妝)，主要係外攜補妝 / 轉妝用。

HK 都有類似產品，但比較難揾兼貴 double

￥298 / 每包 10 支 (約 HKD 21) 

普通人除非好講究個妝，否則都較少用到，但化妝師 out job 就好常用，貪佢夠快夠方便。

如果你好易溶眼妝 / 眼線好易溶落眼底變熊貓眼的話，就可以考慮先用佢抹走眼底啲污漕色，然後至再上返粉補妝喇~

Hair Mask 

Shiseido「TSUBAKI Premium Repair Mask」護髮膜 →

成份具黃金椿油、珍珠蛋白質、胺基酸、蜂王漿及甘油等等，並採用世界首創的革新浸透科技，有效填補受損髮芯空洞、修護髮鱗、增強髮絲彈性光澤、滋潤修護受損髮絲，並補充髮絲流失的蛋白質，改善毛躁、開叉、易斷裂問題。

￥980 (約 HKD 70) 

杰身霜狀質地 →

除了陣味勁香、香到有啲假之外 (我覺得似啫喱果凍味)，用後頭髮又的確係柔順好多，至少順滑過上次買嗰盒 Shisiedo "Fino" 髮膜先，滋潤得來唔黏膩，吸收度快，吹完頭仲 keep 到順滑度，值得購買 🌟

美國「MANIC PANIC」染髮焗油 →

係美國非常出名兼歷史悠久嘅 color treatment，成份具草藥及蛋白質複合物，獨特配方不傷頭髮，不含阿摩尼亞，染後頭髮唔會變乾。

呢款我以前用過係非常好用易上色，顏色極多選擇，色效又持久 (約可 keep 3-4 星期)，但千萬唔好响日本買，HK 買平好多~

￥2480 (約 HKD 176) 

HK 嘅髮品舖只係賣 $98 咋!

上年試過將紫色 + 粉紅色混合溝色染，效果都幾上色幾 sharp→

顏色選擇係勁多，最適合鐘意轉換髮色的人，仲可以自行 mix color 染 →

其他小物

日本指甲貼紙出名款式多，又平過 HK 買 (約 HKD 20-28)，鐘意自己油指甲 / 玩 gel 甲嘅話就可睇睇，買返幾張返屋企玩~

貼上貼紙於甲油 / gel 甲上，再搽層 top coat 封住就得，冇咁單調 →

Eisai 寶寶用品抗菌清潔劑 →

係日本開發的專利兼好出名嘅抗菌消毒噴霧，冇香料 / 色素 / 酒精 / 漂白水或其他致害成份、溫和低刺激性，抗菌效果可維持長達一星期，消毒嬰幼兒玩具 / BB 車 / BB 櫈 / 公仔等等，甚至消毒寵物用品都 ok~

屋企有小朋友 / 寵物的話必備 👍🏻

￥1280 / 250ml 約可噴 800 次 (約 HKD 91) 

MUHI baby 幼兒止癢液 →

無色無味，性質溫和不刺激，不含類固醇 / 激素，有效止癢、蚊叮蟲咬、奶癬、熱痱、濕疹、熱疹、蕁麻疹、皮膚感染、凍傷都可以用，可阻止細菌繁殖。海綿擦頭，方便塗抹，適合 3 個月以上幼兒 / 兒童使用。

呢支又係有小朋友必備! 已回購第 2 支 👍🏻

試過哥哥妹妹俾毒蚊咬到腫晒，搽其他蚊膏都冇效，加上小朋友又討厭搽蚊膏有薄荷味，見佢好痕又驚佢 R 損，結果一搽呢支止癢液就即刻止痕，第二朝仲消埋腫，萬試萬靈~ 

大人細路都用得，我俾蚊咬完搽佢都係即刻止痕，冇味唔剌激嗰吓正~

唔記得咗日本買幾錢，但 HKTV Mall 都有售 $75 / 40ml

Medi Roller 按摩器 →

估唔到一個咁普通嘅碌，用落竟然係超級舒服、超級爽! 😍

唔使俾力推都已經好夠力好舒服，細細個超方便易收藏~

約 HKD40-50

打字打到手攰 / 膊頭酸痛 / 企得耐行到小腿水腫，用佢碌幾碌簡直爽爆~

千萬唔好買嘅產品 

見我個 fd 託我買 Shiseido 副線「ELIXIR」呢 set 洗面泡 (約 HKD 260 一套係抵嘅)，於是我又望吓佢其他產品啦 .......

然後買咗佢呢支「Balancing Oshiroi Milk SPF50 PA++++ 防曬日霜」試試 →

因為洗面泡我皮膚乾唔啱用，所以就揀日霜試了

￥1800 (約 HKD 128) 

一搽上面已經好大陣酒精味! 好難忍受呀..... 😣

衰在呢支咁啱冇 tester 試，否則一定唔會買!

搽面就免了，唯有留待去曬太陽時搽小腿用埋佢啦.......

KATE 新出「Double Line Expert」→

望落去似普通眼線液，其實係一支專用嚟 "畫眼頭 / 畫下眼線假卧蠶 / 畫假雙眼皮線位" 嘅超級淺啡色眼線液。大家知日本好興化卧蠶妝 / 畫假雙眼皮線啦，所以今次去日本都見到有 2-3 個 brand 推出呢類筆。

不過以 HK 人化妝 style 計就真正少用，買咗盞嘥，加上我試過 tester 畫上去其實一啲都唔仿真，效果都幾假，所以可以不買了。

￥850 (約 HKD 60) 

Shiro Waki Bijin 腋下强力美白 Peeling Cream →

雖然我 N 年前已經打咗 laser，腋下唔算黑，但見佢好似好受歡迎咁，就買來試了......

￥880 (約 HKD 62) 

就算唔用响腋下，都可以用响膝頭 / 手踭 / 手背等等.....

同一般 peeling cream 無異，都係搽完等 10 秒左右再打圈捽，然後清洗 →

老實講捽完係見到白淨咗，不過白得都幾假吓囉，好似化咗妝搽咗層好白嘅 makeup base 咁，仲有層厚厚哋嘅白膜停留响皮膚表面封住，唔多好 feel.....

然後幾秒過後仲要 feel 到開始痕 + 泛紅起風疹! 😖

掉得落垃圾筒.....

我仲有買埋佢支美白潤手霜添呀......

又話搽完 10 秒就有即時美白 + 淡紋效果，一啲都唔覺有囉......

但至少呢支冇令我起敏感

Dry Brush Cleanser / Brush Reset Sponge →

唔知大家有冇見過呢類洗化妝掃用具呢? HK sasa 都有售

千萬咪以為佢可以 "乾洗" 到化妝掃，其實佢只係一舊超級粗嘅海綿 (請聯想洗廚房用嗰種黄綠色海綿)，利用海綿上嘅網狀纖維撥走化妝掃上嘅粉。

所以只係撥走，唔係清潔 / 唔係洗掃，方便你撥走咗啲粉後再沾取其他顏色，尤其係當你只得 1 支掃又想化幾隻色時就可以用。

同一原理，其實只要用有凹凸孔印花嘅厨房紙 / 甚至廁紙 / 毛巾都可以做到，仲衛生過用呢類 Dry Brush Cleanser / Brush Reset Sponge，所以並冇需要購買。

洗化妝掃用嘅 Brush Wash Cleaner → 

等於洗掃用嘅 "洗衫板"。

大家洗咗化妝掃咁多年，就算冇佢亦同樣洗到掃、起到泡，所以你話有冇需要買呢?~

Five Seconds Shine 腳踭舊角質死皮挫 →

見佢話係暢銷品，貨架上又 set 埋迷你電視播示範 video，效果好似幾好咁......

約 HKD 100 左右

官網圖示 before & after →

比起傳統腳挫板 / 浮石，「Five Seconds Shine」好處係更衛生不藏污跡細菌，個樣仲 design 得好靚仔有型 →

不過啲凸起嘅微粒就唔多夠密，磨完唔夠光滑，加上 size 太細太薄用時勁易跣手唔好揸，都係我用開嘅 LCN 腳挫板好用好多倍~

今次大阪 shopping 嘅分享係咁多喇~ 多謝大家收睇 🤗