日本天然護膚品牌 🌺Naris 新出「REJUARNA 紅石榴花萃化妝水」用後感

皮膚極乾的 ladies 們請埋位~ 🤗

皆因今次介紹呢支日本 Naris 新出「REJUARNA 紅石榴花萃化妝水」(爽膚水)，絕對會係你杯茶呀~ 除咗係天然萃取成份、連敏感肌都可以用之外，仲係針對膚色暗沉 + 清除舊角質 + 抗氧修復 + 滋潤肌膚而設，價錢仲要係抵用嗰隻!

加上粉紅色樽身亦夠搶眼，日系風格滲出濃厚少女味~ 

(熱切渴望用後可由少婦變少女 🤣)

產品資料 →

Naris REJUARNA 紅石榴花萃化妝水

成份蘊含紅石榴花萃取 + 奇異果 + 葡萄汁發酵萃取，配合嶄新專利技術 "iPF Liquid RJ"，主要針對膚色暗沉 / 清除舊角質 / 抗氧修復而設，有效促進重整肌膚代謝循環，溫和去除肌膚表層老化角質，令隨後搽的護膚品更吸收，同時可補充肌膚水份，並強化肌膚防禦屏障，使肌膚回復通透水潤亮澤。

不含人工色素 / 人工香料 / 礦物油 / 防腐劑，可早晚使用，適合所有膚質包括敏感肌。

Made in Japan

$223 / 180ml @ SaSa

(trial product given by SaSa)

雖然望上去好似好細支，但其實佢都有 180ml 的 →

容量不比一般牌子爽膚水少，甚至大支過部份品牌爽膚水~

採用泵裝設計，比一般要倒出嚟用嘅爽膚水更方便! 

不過佢一泵嘅份量都幾多吓 (下圖份量係 2 泵)，如果你係習慣倒落化妝棉用的話，咁每次用 1-2 泵都 ok，但若然你係好似我咁、習慣倒落掌心拍上面用的話，咁就用 1/3 泵都足夠了 😉

顏色雖有點米白，但佢係冇添加色素的 →

用後感 →

見佢質地好似好稀身、好水質咁，以為搽上面會係清爽 feel 啦，點知原來係超級滋潤 feel 喎! 真係估佢唔到 😲

完全唔係普通保濕補水咁簡單，用後皮膚係極滋潤 + 帶點反光亮澤感，甚至覺得有少少黏稠，有啲似搽咗 B5 gel 嘅觸感，以夏天用計吸收速度唔算快，約 2 分鐘後先至完全吸收晒唔黏手，吸收後仍可 feel 到滋潤感。

所以除非你連夏天都屬沙漠肌，否則咁高嘅滋潤度嘅爽膚水似乎都係留返秋冬用合適啲~ (油性肌就不建議用了)

另外由於佢質感極潤，兼有去舊角質功效，會好適合配合導入導出機 / 去角質剷皮機一齊用，效果係好好~ 

雖然用後除咗滋潤亮澤之外就冇乜其他改善見到，但以價錢計仍然係抵用，如果你皮膚極乾、想平平哋揾支滋潤度高 + 成份天然嘅爽膚水亦值得考慮一下佢，至少我用過好多天然成份嘅爽膚水都冇呢支 Naris 咁潤~ ☺️