2019年11月23日 星期六

加拿大之旅 ✈️「Sephora 化妝品 + 䕶膚品」用後報告

今次去加拿大探親係上年已 plan 好, 有充足時間諗清楚去 Sephora 買啲乜, 以免失守買埋啲唔等使嘢, 點知一去到就遇上 Sephora 減價, 會員全店 85 折! 

對住咁多化妝品䕶膚品, 選擇困難症又發作, 結果摸下呢樣又摸下嗰樣, 唔覺意就逛咗 2 個幾鐘  😅

寫咗 3 晚, 又報告一下買咗啲咩 / 好唔好用啦, 大部份介紹嘅產品 HK 都能買到的~

雖然 HK 都有 Sephora, 但肯定唔及外國咁多牌子揀兼齊貨, 加上外國買點都抵啲, 所以仍然係外遊必逛熱點, 咁啱今次又遇上會員 85 折, 慳返唔少 😊


先講化妝品...... 

其實好多牌子 HK 都有, 至於 HK 冇嗰啲牌子, 我試過又唔係非買不可, 亦唔係咁抵買, 所以最終都係買返啲自己識得, 又有留意開嘅 brand。


NARS 限量「Softcore Mini Blush & Balm Set」迷你版胭脂 + 有色潤唇膏套裝 →

有 3 款色揀, 85 折後連稅 $179, 抵喔 😍

HK NARS 專櫃售 $240


雖說是 mini 版, 但其實都唔算太 mini, 好夠用 →

我揀咗 3 款之中最淡嘅 #Orgasm 蜜桃色系, 除咗係 NARS 嘅大熱顏色, 亦比較適合日常用, 支 lip balm 係帶有超淡蜜桃色嘅潤唇膏, 顏色自然, 質地又夠潤, 返屋企試過後靚到我返轉頭買多咗支 full size 💄


下圖係 NARS 胭脂 + 有色潤唇膏效果 →

係好清淡自然, 適合任何膚色, 返工 / 普通去街都好啱用, 唔濃妝之餘又可加添返少少健康氣色 👍🏻


BECCA 限量「Hydra-Mist Set & Refresh Powder」迷你版碎粉連 lip gloss 套裝 →

被吸引係因為佢寫 "made with 50% water"! 有一半係水份咁咪好保濕囉? 我咁乾用咪好正? 😲

咁啱見有迷你版 travel set, 85 折後連稅 $184, 算好抵! 就買盒 try try (呢款 HK 冇)


碎粉屬透明粉, 而支 Glow Gloss 就 "話" 會隨唇部溫度而變色 →

盒粉一掃上臉係 feel 到濕濕哋 + 有種冰涼感, 雖然頗為貼面, 但個感覺就好似用緊一支整濕過嘅掃搽碎粉咁, 掃極都濕濕哋咁, 都幾奇怪 🥶

頭 1 個鐘都仲覺得效果幾 flawless, 可惜第 3 個鐘開始就滿面油光, 溶晒粉仲要浮粉......好彩買嘅只係 mini 版, 加拿大咁凍咁乾都可以出油溶成咁, 定妝效果奇差, HK 咁潮濕用佢更加係難以想像...... 

反而支 Glow Gloss 就幾滋潤 + glossy, 不過變色效果就唔多覺有, 純粹係透明 lip gloss 一支冇特別, 只勝在夠潤夠光身。

所以雖然呢 set HK 冇得賣, 但都可以不買了 👎🏻


HOURGLASS「Veil Translucent Setting Powder Mini」迷你版定妝碎粉 →

HOURGLASS 嘅粉底我以前都介紹過覺得麻麻, base 又冇乜特別, 賣得又貴, 但碎粉我就未試過。今次見 Sephora 剛好有 mini 版就姑且一試, 萬一唔好用都冇咁肉痛嘛。

85 折後連稅 $148

HK 唔少水貨店都有售, 只係冇呢款迷你版

屬透明粉, 適合任何膚色, 粉質頗幼滑 →


碎粉定妝效果 →

我覺得都好貼薄自然呀~ 冇粉痕又冇卡粉 / 浮粉問題, 加拿大咁乾咁凍天氣下用都唔覺得乾, 亦冇起乾紋, 全日都冇乜點溶妝, 唔錯唔錯~ 👏🏻

(粉底係用咗 NARS 嘅 Tinted Moisturizer 水潤防曬有色面霜, 遮瑕膏用咗 SUQQU)


試咗幾日見效果幾好, 加上有 85 折, 又走返去 Sephora 買咗盒原裝 full size →

打開係靚到無得輸, 個 "H" 字有 Hermés feel, 重點係平過 HK 買成百蚊! 🤩

返到 HK 潮濕天氣下再試用過, 仍然覺得唔錯, 唔算乾又控到油, 持妝效果理想 👍🏻

85 折後連稅 $335 (HK 賣約 $460)


仲有 HOURGLASS 嘅「Lighting Powder」皇牌光影粉 →

一直都認為佢呢盒光影粉係 overpriced, 貴到唔值得買 (HK 專櫃賣 $360), 不過加拿大買就算冇折都唔使 $200 呀! 今次仲要有 85 折喎, 連埋稅都只係 $178! 試得過 🥳


個盒係又 grand 又有型 →


我揀嘅係自然光效果嘅 #Luminous Light →


掃上效果係超 natural, 自然到如果冇陽光係唔覺眼, 有陽光照住先見到啲 😅

雖然粉質都係算幼滑, 又有少少 natural glow 效果好自然, 但又認為唔及 Becca / benefit / NARS 咁光 (應該話好多牌子都光過佢), 亦唔夠 Shiseido 盒光影粉質咁滑, 所以都只係普通吧, 冇網上吹捧講到咁正, 係唔差但亦冇乜驚喜。

外國買 under $200 都仲話試得過, HK 賣 $360 我真係唔建議買, 好過佢嘅選擇有太多..... 


FENTY BEAUTY「Kabuki Brush #160」底妝掃 →

FENTY BEAUTY 係由美國國際歌后 Rihanna 創立嘅化妝品牌, 雖然我唔係 Rihanna 粉絲, 但就俾佢個粉紅色包裝吸引住, 留意咗呢個牌子嘅化妝掃好耐。今次摸到真身, 再摸埋 Sephora 內其他牌子嘅同類 Kabuki Brush, 比較過後都認為佢毛質係靚嘅! 值得一試 👍🏻

85 折後連稅 $251 (HK Sephora 售 $328)


上圖 tester 已被摸到舊晒, 下圖新開係靚好多 →

淡粉色毛毛 + 玫瑰金柄身好精緻 🥰

除咗鐘意佢夠大支, 掃頭切割仲係斜斜哋有弧度, 能更貼合面形輪廓, 毛毛夠軟滑唔刺肉, 仲可乾濕兩用 (纖維毛製), 可用嚟掃粉底液 / 粉底霜 / 碎粉 / 粉餅, 好萬能! 

我而家就主要用佢嚟掃碎粉, 比用普通碎粉掃定妝效果會厚身少少, full coverage 啲, 但又不至於太厚粉~ 遲啲再試下用佢掃濕粉先~


同一牌子「Concealer Brush #180」遮瑕掃 →

一般遮瑕掃都係扁扁平平 style, 而呢支就係厚毛斜角的, 比較獨特! 🤩

85 折後連稅 $195 (HK Sephora 賣 $248)


上圖支 tester 又係被摸到舊晒, 新開靚仔好多 →

同樣係纖維毛製, 可乾濕兩用, 用嚟掃眼周遮瑕液 / 遮瑕膏, 甚至碎粉 / 粉餅都 ok, 而用法亦比一般 concealer brush 簡單, 對準眼底 tap tap tap 印幾印就攪掂, 係快好多嘅! 🥳

不過淚溝就遮得冇咁好 (太大支), 同埋如果沾太多遮瑕膏都會有掃痕 / 厚妝, 份量用少啲就可避免~ 呢支值得一試, 慳返好多遮瑕時間!


諗咗好耐、最終冇買系列 ......

NARS 限量「VOYAGEUR Eyeshadow Palette」眼影組合 →

除咗係新出之外, 仲有 2 盒係 Sephora 限定顏色, HK 未見有 (右邊的 HK 有), 加上折後並唔貴, 係好吸引! 本來睇中右邊嗰盒, 不過一諗起屋企已有好多類似 earth tone 顏色...... 最終理性戰勝佔有慾冇買到 🙌🏻

85 折後連稅 $234 (HK Sephora 賣 $300)


仲有我以前最鐘意嘅 Smashbox →

又係摸完一大輪放棄咗, 免得買完成堆放喺度浪費.....

都係有需要先再買過啦, 未有需要住就等下次吧 😉


輪到 Skincare.......

介紹 Sephora 買咗啲咩新 skincare 前, 先講講我帶咗啲 skincare 去 →

都知道加拿大係好乾, 室外零下凍到乾, 室內有暖氣就仲乾。以我皮膚連喺 HK 都乾到要搽 face oil 計, 又點會唔帶精華油去呢~

湊住呀 B 一切從簡, 只帶咗 Melvita 金盞花精華油 + Glycel 面霜 + Bobbi Brown 眼霜 + 幾塊 paper mask 去, 而日間就 on top 加 NARS 嘅防曬有色潤面霜 (Tinted Moisturizer) 當粉底用, 全部係 travel size 迷你版。

結果都係唔夠潤, 唔夠幾日就乾到全面敏感, 又紅又痕又繃緊, 仲乾到鼻血都流埋..... 😅


於是極速走去 Sephora 揾支潤啲嘅 face oil 解救下, 睇下會唔會好啲.....

JOSIE MARAN「100% Pure Argan Oil」有機堅果油 set → 

JOSIE MARAN 係美國著名 model 創立嘅有機品牌, 8 年前去美國進修時都有買過佢嘅產品。老實講唔覺得佢會潤得過我帶去嗰支 Melvita 金盞花油, 不過撞啱見到有限量 boxset 好抵買, 買定嚟返 HK 用都好 😊  

85 折後連稅 $184 套 (呢款 HK 賣)


2 支都係皇牌產品, 包括堅果油 15ml (左) + 亞麻籽 mix 堅果油 12ml →

雖為 travel size 但都唔算細支, 總好過一買就買原裝 50ml 咁大支


我見外國用家對呢 2 支油普遍讚好, 今次 2 支 travel size 夾埋 $184 都好抵~


去咗加拿大 3 日, 成塊面乾到紅晒, 面珠仲有 2 撻乾到敏感凸起咗 →

搽咗堅果油上面後係潤咗啲嘅, 又好有光澤, 仲淡化晒乾紋, 認為呢支比我以前用過嘅 Argan Oil 都更潤~

不過仍然嫌佢喺加拿大用唔夠潤, 未救到我, 可能我本身皮膚薄, 未適應到咁凍咁乾嘅天氣, 搽完大量 Argan Oil 都秒速吸收, 滋潤感 last 唔到好耐, 不過 HK 用就應該好 ok~ 


然後終於揾到支 "聖油" 急救! 🥳

美國 FARMACY「Honey Grail Ultra Hydrating Face Oil」蜂蜜花卉精華油 →

由美國有機農場出品、以蜂蜜做主要成份嘅天然䕶膚品牌 FARMACY, 於歐美亦係鼎鼎有名, 不含化學物 / 香料 / 礦物油, HK Sephora 都有售, 只係產品種類少好多, 亦唔見有呢支 face oil 賣, 只得幾款暢銷品出售。

85 折後連稅 $357 / 30ml


不過買唔到亦唔需要失望~ ☺️

雖然我好鐘意呢支油, 認為佢超級厚杰超級潤, 解救到我於加拿大時嘅乾爆問題, 但以 HK 天氣計就潤爆咗, 亦並非人人愛用質地厚成咁嘅 face oil。


質地比一般 face oil 都厚杰 →

仲有陣蜂蜜天然淡香味 🐝

以咁厚身嘅 face oil 計算係吸收得快, 就算搽完望上去油淋㵉, 摸上手都係唔黏笠, 滋潤度超班, 持久度亦好滿意, 不過就真係要乾到裂開 / 勁乾天氣下先用得著, HK 用就要將份量減至極少, 或 mix 入其他 skincare 一齊用了。

覺得呢個牌子對 dry skin 都唔錯, 下次有機會可試埋佢其他產品 👍🏻


另外仲買咗佢支「Honey Savior All-in-one Skin Repair Salve」蜂蜜萬用膏 →

含維他命 A、B、C、E、蜂蜜、蜂臘及其他精油, 係一支可搽面 / 搽手 / 搽 body 嘅 all-in-one 修復膏, 除咗高滋潤度, 仲可以舒緩輕微過敏狀況, 有啲似澳洲支木瓜軟膏。

起初怕佢支 face oil 唔夠潤, 諗住買埋佢呢支 "豬油膏" 穩陣, 就算唔搽面都可用嚟局部搽手臂, 因為當時手臂已經有幾個位乾到敏感, 勁痕凸起甩皮了, 自己帶去嘅 Bio-Oil 完全唔夠潤 😣

85 折後連稅 $251 / 46g (呢支 HK 冇賣)


質感係杰撻撻嘅豬油膏, 潤到一個點 →

同樣有種清淡蜂蜜味, 搽上面係潤到反晒光, 蛋都煎到 10 隻嗰種 🍳

不過對當時咁乾同敏感嘅皮膚計就真係好夠潤, 又係厚杰得嚟唔黏手嗰種, 又試過用佢嚟搽咗手臂敏感位都幾好, 舒緩到輕微過敏狀況冇再痕, 但以 HK 天氣計就太潤太厚了.....


The Ordinary「"B" Oil」微藻精華油 → 

大家對加拿大出產嘅 The Ordiary 應該唔陌生, 都係好出名嘅平價高效護膚品牌, 無化學物添加, 亦不含礦物油或香料, 受好多外國用家熱捧。呢支 "B" Oil 連稅後都唔使 $100 蚊, 係好抵! 👍🏻

HK Sephora / 部份 Watson's 等等都有售, 不過就冇呢支 "B" Oil, 只有其他 Rose Hip Oil / 玻尿酸精華 / 分子酊精華 / 眼部精華等等, 都只係 $80 -$140 👏🏻


我揀呢支 "B" Oil 純粹係因為佢屬於混合油, 咩成份都有啲, 除咗含高濃度微藻 + 角鯊稀 + 摩洛哥堅果 + 巴西堅果 + 玫瑰果油, 仲有其他天然籽油, 好似好 "大包圍" 咁, 而用途主要都係滋潤修復。

用咗幾日都覺得唔錯, 搽後都會有輕微反光但唔算油淋淋, 好快就吸收晒唔黏笠, 不過質地就比較薄身唔夠潤, 同埋有種臭臭哋草藥味, 我咁乾就只能日間妝前用, 夜晚用就略嫌唔夠潤。

另外我摸過晒佢啲 tester, 認為呢個牌子嘅 face oil 同精華液都係偏薄身, 雖然我用會覺得唔夠潤, 但就比較適合 HK 人唔鐘意太笠嘅要求, 有功效而售價平係 key point 😊


BITE Beauty「Agave Lip Balm」三件䕶唇迷你套裝 →

只生產唇部產品嘅加拿大 BITE Beauty, 亦係出名到一個點! 以「手工製食品級唇膏」聞名海外, 成份均用食品級天然原料製造, 就算唔小心食落肚都唔怕會危害身體 😍

除咗有推出潤唇膏, 仲有 lip mask / 晚間 lip therapy / lip scrub 磨砂 / lip gloss / lip primer / 唇線筆 / 唇膏筆, 仲有超多款式有色唇膏! 經已推出咗好多年, 好可惜 HK 仍然未有售.....

85 折後連稅 $106 


有色唇膏我已經有好多, 冇乜興趣買, 反而對佢呢 set 䕶唇套裝好有興趣, 加上又好抵買 →

返去試過覺得係返唔到轉頭咁好用! 雖則凡士林都好潤 (我用開瓶裝), 但呢隻 Bite Beauty 就包裝更靚, Lip Balm 厚潤得來更 glossy, Lip Therapy 又係勁潤, 支 Lip Mask 係仲厚潤過凡士林, 好正! 😍

真係覺得好好! 後來諗住返去 Sephora 買埋原裝 full size, 可惜揾咗 3 間都 sold out 了......


最後係 Chloe 同 YSL roll on 香水 →

折後連稅約 $180 支, 唔算平又唔算貴, 純粹貪方便可放手袋帶出街, 而 HK 又好難揾到呢 2 個牌子嘅 roll on 香水 (HK Sephora 未見有, 又或者可能有我睇唔到) 


報告完畢~~ 😊

雖然大部份 product HK 都有售, 但外國買始終抵啲, 就算冇折都仍然比 HK 平, 如咁啱有朋友去外地旅行就記得託人買了~

飛完今次 long haul 湊住 jet lag BB 已筋倦力盡, 有排都唔敢再飛長途住了 🤪


沒有留言:

張貼留言